बेइजिङ : चीनको किङघाई प्रान्त सरकारले युवा तीब्बती भिक्षुलाई मोनास्ट्री (विहार) छोड्न दबाब दिएको छ। सरकारले भिक्षुलाई घर फर्काउँदै आफ्नो विहार छोड्न उनीहरुलाई दबाब दिएको हो।
किङघाई प्रान्तले तीब्बतको परम्परागत धर्म र संस्कृति छोड्न भन्दै युवा भिक्षुहरुलाई धम्कीसमेत दिएको स्रोतले रेडियो फ्रि एसियालाई बताएको छ।
धार्मिक मामिला नियमन गर्न अक्टोबर १ मा सो प्रान्तले भिक्षुहरुलाई विहार छोडाउने घोषणा गरेको र नयाँ कानुन अक्टोबर २० देखि लागु गरिएको बताइएको छ। सो घोषणापश्चात प्रान्तिय सरकारले किङ्घाईस्थित धिस्ता विहारबाट ११ देखि १५ वर्ष उमेर समूहका भिक्षुलाई निकाला गरिसकेको रेडियो फ्रि एसियामा उल्लेख छ।
उत्तरपुर्वी तीब्बतमा अवस्थित सो विहार आम्दो क्षेत्रको ऐतिहासिक विहारको रुपमा चिनिन्छ। ‘सरकारी कर्मचारीले विहारमा छापा मारिरहेका छन् भने प्रान्तीय सरकारले जाख्युङ र अन्य विहारका भिक्षुलाई समेत जबरजस्ती घर पठाइरहेको छ’ स्रोतले रेडियो फ्रि एसियासँग भनेको छ, ‘तीब्बती भिक्षुप्रति यहाँको सरकार निकै निर्दयी र कठोर बनिरहेको छ।’
सरकारले भिक्षुहरुको पहिरन लगाउन र विहार फर्किन प्रतिबन्ध लगाएको समेत बताइएको छ। चीन सरकारले यसअघि सिचुआन प्रान्तमा बसोबास गर्दै आएका भिक्षुलाई जबरजस्ती विहार जान रोक लगाउदै सरकारी विद्यालय पठाएको बताइएको छ।
प्रतिक्रिया लेख्नुहोस्:-