एप्पलका अधिकांश बिग्रिएका उत्पादनहरु बनाउन यसैको आधिकारिक मर्मत स्टोरमा जानु पर्ने हुन्थ्यो। अब भने कम्पनीले आफ्ना आइफोन प्रयोगकर्तालाई आफैं फोन मर्मत गर्न दिने भएको छ।
बुधबार एप्पलले यसका उपकरणका लागि चाहिने स्पेयर पार्ट्सहरु अर्को वर्षदेखि उपलब्ध गराउने घोषणा गरेको छ। यो नयाँ कार्यक्रमलाई कम्पनीले ‘सेल्फ सर्भिस रिपेयर’ नाम दिएको छ, जहाँ आइफोन प्रयोगकर्ताले आफ्ना बिग्रिएका फोनलाई चाहिने सामान किनेर एप्पलको वेबसाइटमा हुने म्यानुअल हेर्दै बनाउन सक्नेछन्।
कम्पनीले सुरुमा डिस्प्ले, ब्याट्री र क्यामराका मोड्युलहरु उपलब्ध गराउने बताएको छ। बिस्तारै यसमा दुई सय भन्दा बढी पार्ट्स र उपकरणहरु उपलब्ध हुने र अर्को वर्षदेखि थप गर्ने योजना बनाएको छ।
यो मर्मत कार्यक्रम अहिले आइफोन–१२ र आइफोन–१३ प्रयोगकर्ताहरुका लागि मात्र उपलब्ध हुनेछ, तर पछि म्याक कम्प्यूटरका लागि पनि बिस्तार हुने सिएनएनले जनाएको छ।
एप्पलले अर्को वर्षदेखि यो कार्यक्रम सुरु भएपछि मात्र आफ्ना स्पेयर पार्ट्सको मूल्यहरु आधिकारिक रुपमा सार्वजनिक गर्नेछ। तर कम्पनीले अहिले मर्मत हुँदा लाग्ने मूल्यमा नै ती पार्ट्सहरु बेच्ने बताएको छ।
हाल संसारभरका करिब दुई सय देशमा एप्पलका दुई हजार आठ सयभन्दा बढी आधिकारिक मर्मत सेन्टरहरु छ, जहाँ यसका सबै उपकरणका पार्टपूर्जा पाइन्छ। अहिलेका लागि भने ‘सेल्फ सर्भिस रिपेयर’ कार्यक्रम अमेरिकामा सुरु हुनेछ। एप्पलले यो योजना सन् २०२२ सम्म अन्य देशहरुमा पनि ल्याउने बताएको छ।
प्रतिक्रिया लेख्नुहोस्:-