देशको एकमात्र अन्तर्राष्ट्रिय विमानस्थल चीनले कब्जा गर्ने रिपोर्टबारे चीनले जवाफ दियो

काठमाडौं। युगाण्डाको एकमात्र अन्तर्राष्ट्रिय विमानस्थल चीनले कब्जा गर्न लागेको भन्दै केही अफ्रिकी न्यूज पोर्टलहरुमा हालैको दिनमा प्रकाशित समाचारको चीनले खण्डन गरेको छ । युगाण्डाले लिएको २०० मिलियन डलर ऋण तिर्न नसकेपछि युगाण्डाको एकमात्र अन्तर्राष्ट्रिय विमानस्थल इन्तेब्बे विमानस्थल चीनले कब्जा गर्ने दावीसहित केही अफ्रिकी समाचार पोर्टलमा यसै साता समाचार प्रकाशित भएको थियो ।

युगाण्डाले यो विमानस्थल विस्तार गर्नको लागि चीनसँग २०० मिलियन डलर ऋण लिएको थियो । तर, त्यो ऋण तिर्न नसकेपछि डिफल्ट व्यवस्थाअनुसार यो विमानस्थलमा चीनको कब्जा हुने रिपोर्टमा दावी गरिएको थियो । युगाण्डाको नागरिक उड्डयन प्राधिकरण र बेइजिङ दुवैले यो समाचारको खण्डन गरेका छन् । चीनको टेकओभरमा सम्झौतामा रहेका केही ‘घातक बुँदाहरु’ कारक रहेको रिपोर्टमा जनाइएको थियो ।

THREAD:

I wish to make it categorically clear that the allegation that Entebbe Airport has been given away for cash is false. @GovUganda can’t give away such a national asset. We have said it before and repeat that it has not happened. There isn’t an ounce of truth in it.

— Vianney M. Luggya (@UCAA_Spokesman) November 27, 2021

यो सम्झौता युगाण्डा सरकार र चीनको एक्सपोर्ट इम्पोर्ट (एक्सिम) बैंक अफ चाइनाबीच ३१ मार्च २०१५ मा भएको थियो । ‘युगाण्डाले एक्सिम बैंक अफ चाइनासँग ३१ मार्च २०१५ मा हस्ताक्षर गरेको ऋण सम्झौतामा भएका केही प्रतिकूल प्रावधानहरु पालना नगरिए युगाण्डाका सार्वभौम सम्पत्तिहरु बेइजिङको नियन्त्रणमा जानेछन्’ युगाण्डाको द मनिटरको एक रिपोर्टमा भनिएको थियो ।

रिपोर्टमा २०१५ को सम्झौतामा भएको व्यवस्थाअनुसार ऋणदाताले युगाण्डाको विमानस्थल कब्जा गर्न चाहेका कुनै सार्वभौम प्रतिरक्षाले यसलाई रोक्न नसक्ने बताइएको थियो । रिपोर्टका अनुसार युगाण्डाले यो सम्झौतामा भएका केही व्यवस्थाहरुलाई पुनरावलोकन गर्नको लागि एक्सिम बैंकसँग छलफल गर्न ११ सदस्यीय प्रतिनिधिमण्डल बेइजिङ पठाएको भए पनि आफ्नो उद्देश्यमा असफल भएको रिपोर्टमा जनाइएको थियो ।

“Which of the Chinese projects in Africa have been confiscated in Africa? NONE! The hype surrounding Chinese ‘debt trap’ in Africa have NO factual basis and is being pushed on malicious grounds”, said @WuPeng_MFAChina, Director-General, Department of African Affairs, MoFA, China pic.twitter.com/Frqvme1frg

— Chinese Embassy in Uganda (@ChineseEmb_Uga) November 26, 2021

रिपोर्टमा बेइजिङ गएको प्रतिनिधि मण्डलको नेतृत्व चीनका लागि युगाण्डाका राजदूत डा. क्रिस्पस कियुंगाले गरेको र यो टोलीमा युगाण्डाको श्रम मन्त्रालय, विदेश मामिला मन्त्रालय, अर्थ मन्त्रालयका प्रतिनिधि तथा युगाण्डडा नागरिक उड्डयन प्राधिकरण र महान्यायाधिवक्ताका प्रतिनिधि समेत सहभागी रहेको रिपोर्टमा दावी गरिएको थियो । युगाण्डाको नागरिक उड्डयन प्राधिकरणका प्रवक्ता र चीनको अफ्रिकी मामिलाका महानिर्देशकले यो रिपोर्टको खण्डन गरेका छन् ।