प्रभू देवाको दोस्रो बिहे, त्यो पनि आफ्नै भातिजीसँग !

मुम्बइ। ४८ वर्षका डान्सर, कोरियोग्राफर, अभिनेता तथा निर्देशक प्रभू देवा बिहे गर्न गइरहेका छन्, त्यो पनि आफ्नै भतिजीसँग । सुन्दा अनौठो लाग्छ तर यो खबर भाइरल भइरहेको छ । खबर निकै चर्चामा छ तर प्रभु देवाको टिमले यसबारे केही बोलेको छैन । प्रभूको तर्फबाट यो खबरको खण्डन पनि गरिएको छैन र समर्थन पनि गरिएको छैन । इ–टाइम्सको रिपोर्टअनुसार प्रभुले आफ्नी भतिजी शोभासँग डेट गरिरहेका छन् र छिटै बिहे गर्ने तयारीमा छन् । यो खबरमा कत्तिको सत्यता छ भन्ने कुरा प्रभूको आधिकारिक बयानपछि मात्रै थाहा हुनेछ ।

प्रभू देवाको पेशागत जीवन जति सफल छ उनको व्यक्तिगत जीवन भने उत्तिकै जटिल रह्यो ।प्रभूले १९९५ मा रामलतासँग बिहे गरेका थिए । रामलता मुस्लिम थिइन् र शास्त्रीय डान्सर थिइन् । बिहेपछि रामलताले हिन्दू धर्म अपनाइन् । उनीहरुका ३ छोरा भए । जेठा छोरा विशालको २००८ मा क्यान्सरका कारण निधन भयो । प्रभू देवा र दक्षिण भारतीइ अभिनेत्री नयनताराको अफेयरको निकै चर्चा चल्यो । यो सम्बनधबारे सुरुमा दुवैले केही बोलेनन् । २०१० मा प्रभूले नयनतारासँग सम्बन्ध स्वीकार गर्दै बिहे गर्न लागेको समेत बताए ।

यो सम्बन्धको खुलासापछि ठूलो कानुनी झमेला पार गरेर २०११ मा प्रभू र रामलताको सम्बन्धविच्छेद भयो । तर, उनको नयनतारासँग बिहे भने भएन । २०१२ मा नयनतारासँग प्रभूको ब्रेकअप भयो । प्रभू अहिले सलमान खानको फिल्म राधेको निर्देशन गरिरहेका छन् । यसबाहेक अब उनका केही दक्षिण भारतीय फिल्म आउँदैछन् जसमा उनी मुख्य भूमिकामा हुनेछन् । पोन मनिकवेल नामको आउँदै गरेको फिल्म उनको अभिनेताको रुपमा ५० औं फिल्म हुनेछ । यसमा प्रभू पुलिस अधिकारीको भूमिकामा देखिनेछन् ।