अमेरिकी मित्र राष्ट्रमा प्रवेश गर्दै चीन : चीनको सहयोगमा ब्यालेस्टिक मिसाइल बनाउँदै साउदी अरब

अमेरिकी राष्ट्रपति जो बाइडेनको विदेश नीतिमा सवाल उठ्नु कुनै नयाँ कुरा होइन । तर हालै मात्र सार्वजनिक एक जानकारीका आधारमा अमेरिकाले प्रतिरक्षा र विदेश नीति दुवैतर्फ मुश्किलको सामना गर्नु परेको छ । एक रिपोर्ट अनुसार चीनले अत्यन्त गुपचुपका साथ अरब देशमा घुसपैठ गरेको छ । अमेरिकाको सबैभन्दा नजिकको मानिएको एक देश साउदी अरबले आफ्नै देशमा चीनको सहयोगमा एक गोप्य ठाउँ तयार गरेको छ ।

त्यहाँ उसले आफ्नो ब्यालेस्टिक मिसाइल बनाइरहेको सीएनएनले आफ्नो एउटा रिपोर्टमा भनेको छ । यसको स्याटेलाइट इमेजमा पनि देखा परेको छ । मिसाइलको विकासमा पनि चीनले साउदी अरेबियालाई सघाउँदै आएको बताइएको छ । बाइडेन प्रशासनले हालसम्म यसको खुलासाको विषयमा कुनै प्रतिक्रिया दिएको छैन । चीन पनि सधैको जस्तो चुप लागेर बसेको छ ।

कसरी भयो यसको खुलासा ?
अमेरिकी टिभी च्यानल सीएनएनले देशको जासुसी एजेन्सीसँग विद्यमान स्याटेलाइट इमेज जारी गरेको छ । यसमा निर्माण साइटका अलावा त्यो ठाउँ पनि देखिएको छ, जसमा परीक्षणपछि निक्लिएको फोहोर व्यवस्थापन गरिएको पत्ता लागेको छ ।

इमेजबाट स्पष्ट पत्ता लाग्छ कि चीन अब इरानको डर देखाएर अरब देशलाई आफ्नो नियन्त्रणमा राख्न चाहन्छ । साउदी अरबले पनि पहिलेनै चीनबाट ब्यालेस्टिक मिसाइल किनिसकेको छ । सीएनएनसँगको कुराकानीमा चीन र साउदी अरब मिलेर ब्यालेस्टिक मिसाइल बनाइरहेको तीन स्रोतले स्वीकार गरेका छन् । चीनले संवेदनशील प्रविधि पनि साउदी अरबलाई हस्तान्तरण गरिसकेको रिपोर्टमा उल्लेख छ ।

किन सफल भइरहेको छ चीन ?
अमेरिका, इजरायल, यूरोप र अरब देश सबैका लागि इरान परमाणु शक्ति बन्नु नै साझा खतरा हो । डोनल्ड ट्रम्प इरानलाई यो शक्तिमा आउनबाट रोक्न चाहन्थे । बाइडेनले कुटनीतिको बाटो रोजे । बाइडेनले साउदी अरब वा खाडी देशलाई महत्व दिएनन्, जुन पहिलेको अमेरिकी सरकारले दिँदै आएका थिए । चीनले यसको फाइदा उठायो । गोप्य र ब्याकडोर कुटनीतिको माध्यमबाट साउदी र अन्य खाडी देशमा आफ्नो पकड बनायो ।

अब तस्बिर प्रमाण दिन्छ कि चीन कहाँसम्म पुगिसकेको छ । यदि अमेरिकाले साउदी अरबलाई दबाब दियो भने उसले चीनसँग पनि कुराकानी गर्नुपर्छ । चीनले साउदी अरबसँग आफ्नो नजिकको सम्बन्ध रहेको बताउँदै आएको छ । साउदी अरब एक शब्द पनि बोल्न तयार छैन । सीएनएनको दाबी अनुसार एजेन्सीलाई सन् २०१९ देखि चीन–साउदीबीचको यो जानकारी थाहा थियो ।

किन बोलेको छैन अमेरिका ?
रिपोर्टमा दाबी गरिए अनुुसार बाइडेनभन्दा अघि डोनाल्ड ट्रम्प पनि साउदी–चीनको यस सम्बन्धको बारेमा जानकारीमा थिए । तर उनले केही पनि गरेनन् । पहिले बाइडेनको डेमोक्रेटिक पार्टीले ट्रम्पमाथि आरोप लगाएको थियो । अब आएर ट्रम्पले बाइडेन प्रशासन चुप लागेर बसिरहेको छ भनेर आरोप लगाउँदै आएका छन् ।