भारतको राजधानी दिल्लीमा कोरोना भाइरसको नयाँ भेरियन्ट ओमिक्रोनको संक्रमण लगातार बढ्दो क्रममा रहँदा नियन्त्रणको प्रयासस्वरुप कर्फ्यु लागु हुने भएको छ।
राज्य सरकारले सोमबारदेखि रातिको समयमा कर्फ्यु लागु गर्ने घोषणा गरेको हो। समाचार संस्था एएनआईले दिल्ली सरकारलाई उद्धृत गर्दै प्रकाशित गरेको समाचारअनुसार सोमबारबाट राति ११ बजेदेखि बिहान ५ बजेसम्म कर्फ्यु लागु हुनेछ।
नयाँ वर्ष सन् २०२२ को अवसरमा हुन सक्ने भीडभाड र त्यसले बढाउने संक्रमणको जोखिमलाई मध्यनजर गरेर सावधानीको लागि रात्रीकालीन कर्फ्युको निर्णय गरिएको हो।
दिल्लीमा आइतबार थप २९० जनामा कोरोना भाइरसको संक्रमण पुष्टि भएको थियो, यो गएको जुन यताकै धेरै हो। भारतमा आइतबार करिब सात हजार मानिसमा कोरोना भाइरसको संक्रमण पुष्टि भएको थियो।
पछिल्लो समय विश्वभर ओमिक्रोन भेरियन्टको संक्रमण फैलिएको छ विशेष गरी युरोपका देशमा ओमिक्रोन तीव्र गतिमा फैलिएको हो। फ्रान्समा आइतबार एकैदिन एक लाखभन्दा बढीमा संक्रमण पुष्टि भएको छ।
प्रतिक्रिया लेख्नुहोस्:-