एन्ड्रोइड फोनको यो फिचर, जसले आपतकालमा जोगाउन सक्छ तपाईंको ज्यान

काठमाडाैं । हाम्राे दैनिक सहजताका लागि मोबाइल निर्माता कम्पनीहरूले विभिन्न फिचर उपलब्ध गराएका हुन्छन् । तर धेरैजसो प्रयोगकर्तालाई आफ्नै फोनमा भएका कतिपय जीवन उपयोगी फिचरबारे जानकारी नहुन सक्छ ।

यस्तै एउटा फिचर हो ‘मेडिकल फिचर’ । हरेक एन्ड्रोइड फोनमा प्रयोगकर्ताको स्वास्थ्यलाई मध्यनजर गर्दै मेडिकल फिचर उपलब्ध गराइएको हुन्छ । यद्यपि सबै प्रयोगकर्ताले यो फिचर प्रयोग गरेका हुँदैनन् ।

तर कहिलेकाहिँ यस्तै फिचरले तपाईंको ज्यान जोगाउन पनि सक्छ । फोनमा हुने ‘इमर्जेन्सी’ फिचरले यी सबै काम गर्ने गर्छ । यो सिस्टम तपाईंको फोनमा तपाईंको मेडिकल विवरण राख्नका लागि बनाइएको हो ।

केही फोनमा तपाईंको स्वास्थ्यसम्बन्धी उपयोगी जानकारी मात्र राखिएको हुन्छ भने केही फोनमा तपाईंले आफ्नै विवरण पनि थप गर्न सक्नुहुन्छ । यदि तपाईं कुनै कारणले दुर्घटनामा पर्नुभयो वा डरलाग्दो गरी अप्ठ्यारोमा पर्नुभयो भने यसले तपाईंको जीवन रक्षा गर्नसक्छ ।

खासगरी आफू असहाय महसुस हुने गरी समस्यामा पर्दा यो फिचर निकै काम आउन सक्छ । यसमा आफ्नो इमर्जेन्सी सम्पर्क नम्बर र मेडिकल जानकारी राख्न बढीमा १० मिनेट जति लाग्छ । झञ्जट नमानी यत्ति काम गर्नुभयो भने तपाईंको फोन नै आपतमा तपाईंको जीवन रक्षा गर्ने साथी बन्न सक्छ ।

एन्ड्रोइड फोनमा यसरी राख्नुहाेस् इमर्जेन्सी विवरण
एन्ड्रोइडमा यो प्रक्रिया फोनको ब्राण्ड र अपरेटिङ सिस्टमअनुसार फरक हुन सक्छ । तपाईंले बुझ्नुपर्ने कुरा के हो भने तपाईंको फोन लिने व्यक्तिले फोन अनलक नगरी तपाईंको सन्देश र आपतकालीन जानकारी हेर्न सक्दछ ।

एन्ड्राेइड फाेनमा इमर्जेन्सी विवरण राख्न सबैभन्दा पहिले फाेनमा रहेकाे Setting एप खाेल्नुहाेस् । एन्ड्राेइडका भर्सनअनुसार विभिन्न सेटिङ प्यानलमा याे फिचर हुने भएकाले सजिलाेका लागि स्क्रिनकाे माथि रहेकाे सर्च बारमा Emergency information लेखेर सर्च गर्नुहोस् । त्यसबाट देखिने परिणामले तपाईंलाई सेटिङको उपयुक्त स्थानमा पुर्‍याउनेछ ।

मेडिकल विवरण राख्न ‘इडिट इन्फर्मेसन’ मा इडिट गर्नुहाेस् । तर याे फिचर सबै देशमा उपलब्ध नहुन सक्छ । यसकारण धेरैजसो एन्ड्रोइड डिभाइसमा इमर्जेन्सी कन्ट्याक्ट नम्बरहरू र म्यासेज कन्फिगर गर्ने सुविधा छ ।

यदि साओमीको स्मार्टफोन प्रयोग गर्दै हुनुहुन्छ भने सबैभन्दा पहिले Setting एप जानुहाेस् । त्यसपछि Passwords & security मा ट्याप गर्नुहाेस् । यसपछि Emergency SOS मा जानुहाेस् ।

त्यसपछि आउने Emergency Contacts मा ट्याप गर्नुहाेस् । त्यसपछि ‘Edit‘ मा ट्याप गरी कन्ट्याक्ट लिस्टबाट बढीमा तीन वटा नम्बर इमर्जेन्सी कन्ट्याक्ट्स छनाैट गर्नुहाेस् र Cancel वा ‘Send Now’ ट्याप गर्नुहाेस् ।

अरुले तपाईंको फोन हेर्दा कस्तो देखिन्छ भनेर हेर्न वा अरु कसैको फोनमा मेडिकल सूचना हेर्ने अभ्यासको रुपमा पावर बटन दबाएर वा स्क्रिनमा ट्याप गरेर फोन अनलक गर्ने कोसिस गर्नुहोस् ।

पासवर्ड राख्ने स्थानमा पुगेपछि त्यहाँ रहेको ‘Emergency Call’ अप्सनमा जानुहाेस् । भित्र गइसकेपछि तपाईंले इमर्जेन्सी विवरण देख्न सक्नुहुनेछ । एन्ड्राेइड फाेनमा कम्पनी र अपरेटिङ सिस्टमअनुसार यसकाे प्रक्रिया र फिचर फरक फरक हुने गर्छ ।