काठमाडौं। जासुसी सफ्टवेयर पेगासस डीलका विषयमा अमेरिकाको प्रतिष्ठित अखबार न्यूयोर्क टाइम्सले भारतमाथि गम्भीर आरोप लगाएको छ । यो रिपोर्ट प्रकाशित भएसँगै भारतको राजनीतिमा बबाल मच्चिएको छ । ५ राज्यमा निर्वाचन हुनुभन्दा ठिक अगाडि यो रिपोर्ट प्रकाशित भएपछि विपक्षी दलहरु सत्ताधारी भारतीय जनता पार्टी र प्रधानमन्त्री नरेन्द्र मोदीप्रति आक्रामक रुपमा प्रस्तुत भएका छन् ।
पेगासस डीलका विषयमा न्यूयोर्क टाइम्सको रिपोर्ट प्रकाशित भएपछि कांग्रेस केन्द्र सरकारप्रति आक्रामक छ । कांग्रेसले प्रधानमन्त्री कार्यालयले यो रिपोर्टबारे जवाफ दिनुपर्छ । कांग्रेसका नेता राहुल गान्धी, श्रीनिवास बीवी, शक्ति सिंह गोहिल, कार्ति चिदंबरमले ट्वीट गरेर यो रिपोर्टबाट सरकारले करदाताको पैसाबाट ३०० करोड रुपैयाँमा पत्रकारहरु र नेताहरुको जासुसी गर्नको लागि पेगासस स्पाइवेयर किनेको प्रमाणित भएको बताएका छन् ।
न्यूयोर्क टाइम्समा शुक्रबार प्रकाशित एक रिपोर्टमा जुलाइ २०१७ मा भारतीय प्रधानमन्त्री नरेन्द्र मोदी इजरायल गएका बेला २ अर्ब डलरमा भारतले इजरायलसँग भारी रक्षा सम्झौता गरेको दावी गरिएको छ । यो डीलमा मिसाइल सिस्टमको साथमा इजरायली कम्पनी एनएसओले बनाएको पेगासस स्पाइवेयर प्रमुख थियो । गत वर्ष पेगाससबाट कैयौं देशका नेता, पत्रकार र सामाजिक कार्यकर्ताको कल रेकर्ड गरिएको खुलासा भएको थियो । भारतको मोदी सरकारले पेगासस किनेको आरोप स्वीकार त गरेको छैन तर अस्वीकार पनि गरेको छैन ।
कांग्रेस नेता राहुल गान्धीले पेगासस डील गरेर मोदी सरकारले देशद्रोह गरेको बताएका छन् । राहुलले ट्वीटमा लेखेका छन् ‘मोदी सरकारले हाम्रो लोकतन्त्रका प्राथमिक संस्थाहरु, राजनेताहरु र जनताको जासुसी गर्नको लागि पेगासस किनेको थियो । फोन टेप गरेर सत्तापक्ष, विपक्ष, सेना, न्यायपालिका सबैलाई निशाना बनाइएको छ । यो देशद्रोह हो । मोदी सरकारले देशद्रोह गरेको छ ।
प्रतिक्रिया लेख्नुहोस्:-