जापानको राजधानी टोकियोमा कोरोना भाइरसको ओमिक्रोन भ्यारिएन्को संक्रामक उपप्रकार बीए.२ स्थानीय स्तरबाटै सरेको पूष्टि भएको छ ।
बीए.२ उपप्रकार शुरुमा देखिएको ओमिक्रोनभन्दा निकै संक्रामक रहेको बताइएको छ । पछिल्लो समय विश्वभर ओमिक्रोन फैलिरहेको छ ।
बिहिबार अधिकारीहरुले बताएअनुसार अहिलेसम्म टोकियोमा जोनोम विश्लेषणपछि सात जनामा बीए.२ को संक्रमण पहिचान भएको छ । संक्रमितमध्ये दुई जना हालसालै विदेश यात्रामा गएको वा विदेश गएर आएका व्यक्तिको सम्पर्कमा आएकै थिएनन । ती दुबैमा जनवरीमा उपप्रकार पाइएको हो ।
यो टोकियोमा स्थानीय स्तरबाट ओमिक्रोनको उपप्रकारको संक्रमण सरेको पहिलो घटना भएको बताइएको छ । जनवरीको अन्त्यमा टोकियो महानगर सरकारले बीए.२ को संक्रमण पत्ता लगाउन पीसीआर परीक्षण शुरु गरेको थियो । बिहिबार मध्याहन्नसम्म २८५ जनाको परीक्षण भएको बताइएको छ ।
पछिल्लो समय टोकियोमा मौलिक ओमिक्रोन हाबी छ । बीए.२ कसरी फैलिरहेको छ भनेर नजिकबाट नियाल्नु आवश्यक भएको अधिकारीहरुले बताएका छन् । टोकियोमा पछिल्लो समय दैनिक संक्रमण १७ हजार आसपास रहँदै आएको छ ।
प्रतिक्रिया लेख्नुहोस्:-