काठमाडौं। पाकिस्तानको कराची सहरमा एक महिला सामाजिक कार्यकर्ताको चक्कु प्रहार गरेर हत्या गरिएको छ । पुलिसका अनुसार महिलाको हत्यामा उनका एक छिमेकी जिम्मेवार छन् । उनका ती छिमेकीलाई नशाको लत छ । यो घटना मंगलबार दिउँसो न्यू कराचीमा भएको हो । पुलिसका अनुसार २४ वर्षकी सबा असलम आफ्नो घरबाट कहीँ जानको लागि बाहिरि निस्किएका बेला यो आक्रमण भएको हो ।
समाजसेवी संस्था छिपा वेलफेयरको एम्बुलेन्समा उनलाई अब्बासी शहीद अस्पताल लगिएको थियो । अस्पतालमा डाक्टरहरुले उनलाई मृत घोषित गरे । छिपा वेलफेयरका एक कार्यकर्ताका अनुसार मंगलबार दिउँसो साढे १२ बजेतिर एम्बुलेन्स घटनास्थलमा पुग्दा सबा असलम जमिनमा लडेकी थिइन् । स्थानीयले बताएअनुसार सबा असलम घरबाट बाहिर निस्किनासाथ मोटरसाइकलमा आएका २ जना नकाबधारीहरुले उनको पिठ्युँमा धारिलो हतियारले आक्रमण गरे जसका कारण उनको मृत्यु भयो ।
यो घटनामा सबा असलमको परिवारको तर्फबाट कुनै एफआइआर दर्ता गरिएको छैन । परिवारले एफआइआर दर्ता नगरेपछि राज्य सरकारले आफ्नो तर्फबाट हत्याको एफआइआर दर्ता गरेको छ । न्यू कराचीकी सबा असलमले ५ वर्ष पहिले अनीसा वेलफेयर नामको एक संस्थाको स्थापना गरेकी थिइन् । यो संस्थाले धेरैजसो बाल श्रम र विधवाहरुको लागि काम गर्छ । असलमको संस्थाको तर्फबाट चिकित्सा शिविरहरु आयोजना गरिन्छन् ।
प्रतिक्रिया लेख्नुहोस्:-