काठमाण्डाै – प्रतिनिधि सभाको अन्तर्राष्ट्रिय सम्बन्ध समिति अन्तर्गतकाे नागरिक उड्ड्यन, युरोपेली देश र इजरायल हेर्ने डेस्कले निषेधाज्ञाको समयमा चार्टर्ड उडानकाे भाडा बढी लिनेलाई कारबाही गर्नुपर्ने बताएको छ ।
मङ्गलवार अन्तर्राष्ट्रिय सम्बन्ध समिति अन्तर्गकाे नागरिक उड्ड्यन, युरोपेली देश र इजरायल हेर्ने डेस्कले नेपाल नागरिक उड्ययन प्राधिकरणका महानिर्देशकसँग छलफल गर्दै निषेधाज्ञाको समयमा चार्टर्ड उडानमा आवश्यकताभन्दा बढी भाडा लिइ नागरिकलाई ठगिएको जनगुनासो आएकाले ठगीमा संलग्नको पहिचान गरी कारबाही गर्न अनुरोध गरिएको हो ।
छलफलबारे जानकारी दिँदै समिति सदस्य दिव्यमणि राजभण्डारीले नाजायज फाइदा उठाउनेलाई कारबाही गरिनुपर्ने भन्ने कुरा राखेको बताउनुभयो । उहाँले नेपालको एअरलाइन्सलाई युरोपमा अझै कालोसूचीमा राखिएको भन्दै कालोसूचीबाट हटाउनका निम्ति के–कसरी काम गर्दा सहयोग पुग्छ भन्ने विषयमा छलफल गरिएको पनि बताउनुभयो ।
समिति सदस्य राजभण्डारीले भन्नुभयो, ‘नाजायज फाइदा उठाएकालाई कारबाही होस् भन्ने हाम्रो भनाइ छ । यदि उहाँहरूले गल्ती गर्नुभएको छैन र कम्युनिकेशन ग्यापले गर्दा अप्ठ्यारो भएको हो भने उहाँहरूलाई इन्फरमेशन राम्रो जाओस् भन्ने धारणा राख्यौँ । नेपालको एअरलाइन्स युरोपले ब्ल्याकलिस्टिङ गरिरहेको छ । ब्ल्याकलिस्टिङबाट निकालेर पर्यटन, उद्योग र समग्र देशको विकासका निम्ति सहयोग पुर्याउन सकोस् भन्ने उद्देश्यले अगाडि बढाउनका निम्ति आजको मिटिङबाट प्रयास गर्याैँ ।’
उहाँले नेपाल वायु सेवा निगमसँग चिनियाँ जहाजको सञ्चालनमा देखिएको समस्याको सम्बन्धमा छलफल गरिएको पनि बताउनुभयो । साथै आन्दोलनरत कर्मचारीले किन आन्दोलन गरिरहनुपरेको छ भन्ने विषयमा पनि समिति सदस्यहरूले जानकारी लिएको उहाँले बताउनुभयो ।
छलफलका क्रममा नेपाल नागरिक उड्डयन प्राधिकरणका महानिर्देशक राजन पोखरेलले चार्टर्ड उडानमा स्वाभाविक रूपमा भाडा बढी हुने भए पनि अनियमितता भने नभएको बताउनुभयो । एअरलाइन्सकाे पक्षबाट कुनै पनि अनियमितता नभएको उहाँको भनाइ छ ।
छलफलमा नेपाल नागरिक उड्डयन प्राधिकरणका महानिर्देशक राजन पोखरेल, नेपाल वायु सेवा निगमका प्रबन्ध निर्देशकसहित पाँच जना समिति सदस्यको उपस्थिति रहेको थियो ।-उज्यालो अनलाईन
प्रतिक्रिया लेख्नुहोस्:-