४० किलो चाँदीसहित एक जना पक्राउ

रौतहट : रौतहटबाट प्रहरीले ४० किलो चाँदीसहित एक जनालाई पक्राउ गरेको छ । पक्राउ पर्नेमा सर्लाही मलंगवा नगरपालिका २ का ३५ वर्षीय विद्यानन्द साह रहेका छन् ।

काठमाडौंबाट आएको बसबाट गौर बसपार्कमा ओर्लिएका उनलाई विशेष सूचनाका आधारमा प्रहरीले पक्राउ गरेको हो । उनको साथबाट दुई वटा पोकामा रहेको उक्त परिमाणको चाँदी बरामद भएको रौतहट प्रहरीका एसपी विनोद घिमिरेले मध्यान्हलाई जानकारी दिए । उनले भने, ‘युरिका इन्भेष्टमेन्ट बैंक ज्ञानेश्वर काठमाडौंबाट माँ जानकी एण्ड कृष्णा ज्वेलर्सको नाममा २० सेप्टेम्बरमा खरिद गरिएको उक्त चाँदी खरिद गरिएको विलमा देखिएको छ ।’

२० लाखमा खरिद गरिएको उक्त चाँदी सुनचाँदी व्यवसायीबाट परीक्षण गराएर आवश्यक अनुसन्धानको लागि राजश्व कार्यालय पथलैया बुझाउने तयारी भइरहेको एसपी घिमिरले बताए । ठूलो परिमाणमा चाँदी गौरको व्यवसायीको नाममा आएपनि उक्त चाँदीको खपत न्यून रहेको हुँदा सिमापारी भारतीय बजारतर्फ तस्करी गराउन ल्याएको हुनसक्ने प्रहरीले जनाएको छ ।