कसरी भइरहेको छ भूपेन्द्र बडुवाल हत्या प्रकरणको अनुसन्धान ? अझै पक्राउ परेनन् फरार नवीन

काठमाडौं । कैलालीको लम्कीचुहा नगरपालिका–१ का २३ वर्षीय भूपेन्द्र बडुवालको हत्या भएको तीन साता बित्दा पनि प्रहरीले मुख्य योजनाकार भनिएका नवीन रावललाई पक्राउ गर्न सकेको छैन । उनी फरार छन् ।

प्रहरीले अहिलेसम्म १० जनालाई पक्राउ गरेको छ । थप दुईजनालाई सार्वजनिक गर्ने तयारी भइरहेको जनाइएको छ । होटेल संगम चिसापानीका सञ्चालक नवीनको योजनामा खुकुरी प्रहार गरेर भूपेन्द्रको हत्या भएको प्रहरीले जनाउँदै आएको छ ।

जिल्ला प्रहरी कार्यालय कैलालीका प्रहरी नायब उपरीक्षक प्रतीक विष्टले हत्या प्रकरणको अनुसन्धान ‘गोइङ एन्ड प्रोसेस’मा रहेको जानकारी दिए । ‘‘अहिले विभिन्न कारणले मुख्य हत्यारा पक्राउ गर्न नसकिएको अवस्था छ । यस्तो अवस्थामा हामीले घटनास्थलका साना–साना कुराहरूलाई पनि अनुसन्धान गरिहरेका छौँ । यही क्रममा पक्राउ गरेका १० जनाहरूको प्रतिक्रिया लिइरहेका छौँ,” विष्टले भने ।

अनुसन्धानमा खटिएको सीआईबीको टोलीले केही मानिसलाई नियन्त्रणमा लिएको जनाएको छ ।‘‘अनुसन्धान जारी छ । हत्यामा प्रयोग भएका मोटरसाइकल, पेस्तोललगायत सामग्री बरामद गरेका छौँ । यसरी नै एकपछि अर्को हत्यामा प्रयोग भएका साधनहरू फेला पर्दै गएका छन्,” विष्टले भने ।

भूपेन्द्र हत्या प्रकरणमा १६ जनाविरुद्ध किटानी जाहेरी परेको छ । तीमध्ये केही व्यक्ति निर्दोषसमेत रहेको हुन सक्ने प्रहरीको भनाइ छ ।

‘‘सामान्य रूपमा गाडी खोजिदिएको, हत्याको बेलामा गाडी भाडामा दिएका व्यक्तिहरू पनि नियन्त्रणमा लिएका छौँ । यस्ता व्यक्तिहरूको नाम सार्वजनिक गरेका छैनौँ । अहिले नै सबै कुरा भन्दा मुख्य नाइके पक्राउ गर्न असहज हुन्छ । हामीले हत्याको रहस्य लुकाउन खोजेका होइनौँ,” विष्टले भने ।

घटना अनुसन्धानका क्रममा रहेकाले अहिले सबै कुरा खुलाउन नमिल्ने प्रहरीले जनाएको छ । प्रहरीको प्रारम्भिक अनुसन्धानले भूपेन्द्रमाथि आर्यन देवकोटाले चक्कु प्रहार गरी हत्या गरेको खुलेको छ । काठमाडौंमा बस्दै आएका भूपेन्द्र अमेरिका जाने अन्तिम तयारीमा थिए । उनी दसैँ मनाउन घर गएका थिए ।

लम्कीचुहा नगरपालिका–१ का २२ वर्षीय कपिल श्रेष्ठले भूपेन्द्रलाई गएको कात्तिक २३ गते राति ८ बजे घरबाटै ‘साथीलाई समस्या परेको’ भन्दै लिएर गएका थिए । श्रेष्ठलाई प्रहरीले पक्राउ गरिसकेको छ ।

लम्कीचुहाबाट राति श्रेष्ठसँग गएका भूपेन्द्रलाई टीकापुर नगरपालिका–१ मा नवीनको समूहले आक्रमण गरी हत्या गरेको अनुसन्धानका क्रममा खुलेको प्रहरीले जनाएको छ ।