काठमाडौं। अमेरिकामा आजीवन कारावासको सजाय काटिरहेका मेक्सिकोका खतरनाक डन अल चापो भनिने जोआकिन गुजम्यानकी पत्नीलाई यो गिरोहलाई सहयोग गरेको आरोपमा ३ वर्षको जेल सजाय सुनाइएको छ । ३२ वर्षकी एमा कोरोनेल एसपुरोले गएको जूनमा आफ्नो अपराध स्वीकार गरेकी थिइन् । उनले आफ्ना पतिलाई मेक्सिकोको जेलबाट भगाउन सहयोग गरेको पनि स्वीकार गरेकी छिन् । अल चाोिले अहिले अमेरिकाको कोलोराडोको जेलमा आजीवन कारावासको सजाय काटिरहेका छन् ।
एमालाई यी आरोपमा पतिलाई जस्तै आजीवन कारावासको सजाय हुन सक्थ्यो तर सरकारी वकिलहरुले उनलाई पश्चात्ताप गरिरहेको देखेर कम सजाय दिन माग गरेका थिए । अदालतका दस्तावेजका अनुसार ब्युटी क्विन रहिसकेकी एमाले आफ्ना पति गुजम्यान र सिनालोआ कार्टेल वा गिरोहसँग कोकिन, मेथाम्फेटामाइन, हेरोइन र गाँजालाई अमेरिका ल्याउन र यसबाट भएको कमाइलाई बाहिर निकाल्न षड्यन्त्र गरेकी थिइन् । अमेरिकी अधिकारीका अनुसार अल चापोको कार्टेल अमेरिकामा सबैभन्दा धेरै ड्रग्स ल्याउन जिम्मेवार थियो ।
अधिकारीहरुका अनुसार उनले २०१५ मा मेक्सिकोको एक अति सुरक्षित जेलमा रहेका पतिलाई भगाउन जेलनजिकै एउटा सम्पत्ति किनेर सहयोग गरेकी थिइन् । त्यसपछि अल चासो सुरुङमा चलाउनको लागि विशेष किसिमले बनाइएको मोटरसाइकलमा चढेर जेलबाट भागेका थिए । गुजम्यान त्यतिबेला सुरुङको माध्यमबाट पत्नीले किनेको सम्पत्तिसम्म पुग्न सफल भएका थिए । सुरुङमा हावा र प्रकाशको प्रबन्ध थियो र मोटरसाइकल पनि राखिएको थियो ।
एमाले अल चापोलाई जीपीएस जडान गरिएको घडी दिएकी थिइन् जसको सहयोगमा सुरुङ खन्नेहरुले अल चापो कहाँ छन् भन्ने थाहा पाएका थिए । अल चापो भागेपछि कैयौं महिनासम्म थाहा नै भएन र निकै नाटकीय तरिकाले उनी हलिउड अभिनेता शन पेनको साथमा एक अन्तरवार्तामा देखिए ।
मंगलबार वाशिङटनको एक अदालतमा सजाय सुनाइने क्रममा एमाले दोभाषेको सहयोगमा स्पेनिश भाषामा आफूलाई कसैलाई पनि नोक्सानी गरेकोमा साँचो मनले पछुतो भएको बताइन् । संघीय अभियोजक एन्थोनी नारडोजीले यसअघि यही महिना अदालतमा एमाले गरेको काम गम्भीर भए पनि उनको भूमिका निकै कम भएको र उनले निकै छिटो आफ्नो अपराध स्वीकार गरेकोले उनलाई ४ वर्ष मात्र जेल सजाय दिन माग गरेका थिए ।
न्यायाधीश रुडोल्फ कन्ट्रेरसले मंगलबार उनलाई तीन वर्षको जेल सजाय सुनाए । उनले आदेशमा एमाको १५ लाख डलरको सम्पत्ति जफत गरिने र रिहा भएपछि ४ वर्षसम्म निगरानीमा रहनुपर्ने आदेश दिए । न्यायाधीशले उनलाई भविष्यको लागि शुभकामना दिँदै उनले आफ्ना छोरीहरुको पालनपोषण अहिलेको भन्दा फरक वातावरणमा गर्ने अपेक्षा पनि व्यक्त गरे । एमाका वकिलले मिडियामा उनले अमेरिकी अधिकारीलाई सहयोग गरेको रिपोर्ट आएकोले उनलाई मेक्सिकोमा ज्यानको खतरा हुन सक्ने आशंका व्यक्त गरे । वकिलले भने ‘मलाई लाग्दैन उनी कहिल्यै आफ्नो घर फर्किन सक्नेछिन् ।’
एमाको जन्म अमेरिकामा भएको थियो । उनका पिता सिनालोआ गिरोहका सदस्य थिए । अल चापोसँग एमाको भेट १७ वर्षको उमेरमा भएको थियो र त्यसको एक वर्षपछि उनले अल चापोसँग बिहे गरिन् । एमाका पितालाई २०१७ मा मेक्सिकोमा हतियारसँग सम्बन्धित एउटा केसमा जेल सजाय दिइएको छ । उनका काकालाई मेक्सिकोको मोस्ट वान्टेड डन मानिन्थ्यो र उनको २०१० मा मेक्सिकोको सेनासँग भिडन्तमा मृत्यु भयो ।
एमासँग अमेरिका र मेक्सिको दुवै देशको नागरिकता छ । उनी अल चापोका जुम्ल्याहा सन्तानकी आमा हुन् । न्यूयोर्कमा आफ्ना पतिविरुद्ध चलेको सुनुवाइमा उनी लगभग प्रत्येक दिन उपस्थित भइन् । यस क्रममा एमाले हत्या र बलात्कारका डरलाग्दा वृत्तान्त सुनिन् । यस क्रममा उनले अल चापोले आफ्नो र अन्य पे्रमिकाको जासुसी गराउँथे भन्ने पनि थाहा पाइन् ।
यो सुनुवाइ सकिएपछि उनले अल चापोप्रति इमान्दार रहँदै भनेकी थिइन् ‘म आफ्ना पतिलाई त्यसरी चिन्दिन जसरी उनलाई देखाउने कोसिस भइरहेको छ । म उनलाई त्यो व्यक्तिको रुपमा चिन्छु जोसँग मेरो भेट भएको थियो र मेरो बिहे भएको थियो ।’ अल चापो गुजम्यान मेक्सिकोको उत्तर पश्चिमी इलाकामा रहेको सिनालोआ प्रान्तको निकै गरिब परिवारका थिए । उनको संगठित अपराध यतिसम्म बढेको थियो कि २००९ मा उनी १ अर्ब अमेरिकी डलर सम्पत्तिसहित उनी विश्वका ७०१ औं धनी व्यक्ति बनेका थिए । अहिले एमासँन्ग अल चापोको करिब ५ अर्ब डलर सम्पत्ति भएको विश्वास गरिन्छ ।
प्रतिक्रिया लेख्नुहोस्:-