काठमाडौं, फागुन ६ गते । वायुसेवा सञ्चालक सङ्घले हवाई यात्रामा प्रयोग गरिँदै आएको पिसिआर जाँच र सिसिएमसी फाराम हटाउन आग्रह गरेको छ ।
कोरोना महामारीबाट प्रभावित पर्यटन उद्योग अझै अन्याेल भएको अवस्थामा पर्यटकहरुलाई झन्झटिलो प्रकृया मात्र भएकाले यसको प्रभावकारिता नभएको भन्दै हटाउन व्यवसायीहरुले माग गरेका छन् ।
यी जाँच र भर्नुपर्ने फारम झन्झटिलो प्रक्रिया भएको र नेपाल प्रवेशमा मात्र भएकाले पर्यटकको आगमनमा कमी आएको सङ्घका अध्यक्ष क्याप्टेन रामेश्वर थापाले विज्ञप्तिमार्फत उल्लेख गर्नुभएकाे छ। महामारी रोकथाममा अन्य सरल उपाय अपनाउन सकिने उहाँको भनाइ छ ।
कोरोना सङ्क्रमण दरमा कमी आएको र स्वास्थ्य विशेषज्ञ तथा अनुसन्धानकर्ताहरुले समेत आउँदा दिनमा कोरोनाको प्रभाव स्वतः कम हुँदै जाने सुझाव दिएको छ । छिमेकी मुलुक भारत, भियतनाम तथा अन्य युरोपेली मुलकले समेत हवाई यात्राका लागि पिसिआर जाँच र सिसिएमसी फारमको व्यवस्था अनिवार्य गरेको छैन ।
त्यसैले खोप लगाएकाहरुलाई सरल र सहज आगमनको वातावरण बनाउन समेत सरकारसँग सङ्घले विज्ञप्तिमार्फत प्रधानमन्त्रीसमक्ष आग्रह गरेको छ ।
प्रतिक्रिया लेख्नुहोस्:-