काठमाडौं । कोरोना संक्रमणको चेन ब्रेक गराउन सरकारले काठमाडौ उपत्यकामा दुई महिनादेखि लगाएको निषेधाज्ञा खुकुलो भएसँगै त्यसले जोखिम बढाउन सक्ने भन्दै विज्ञहरूले सचेत गराएका छन् । सार्वजनिक सवारी जोरविजोर प्रणाली र पसलहरू पूर्ण रूपमा खुल्दा स्वास्थ्य सावधानीमा ध्यान नदिए तेस्रो लहरको जोखिम बढाउने विज्ञहरूको चेतावनी छ ।
संक्रमणको दोस्रो लहरले आक्रान्त पारिरहेको बेला म्युटेट भएर आएको नयाँ भेरियन्टले जोखिम बढाएको छ । स्वास्थ्य मन्त्रालयले संक्रमणको तेस्रो र चौथो लहर आउन सक्ने चेतावनी दिइसकेको छ । निषेधाज्ञा जारी भएको दुई महिनामा पनि संक्रमितको संख्या उल्लेख रूपमा घट्न सकेको छैन ।
ठूलो तप्का खोपबाट बञ्चित हुनु र संक्रमित भेटिरहेको समयमा निषेधाज्ञा खुकुलो हुँदा संक्रमणको चक्र बढ्नसक्नेप्रति विज्ञहरूले सचेत गराएका छन् । जनजीवन चलयमान हुन थालेसँगै भीडभाड पनि उत्तिकै बढेको छ । जनस्वास्थ्य विज्ञ डा.शरद वन्त यस्तो बेला सर्वसाधारण आफैँले विचार नपु¥याउने हो भने त्यसले जोखिम थप बढाउने खतरा रहेको बताउनुहुन्छ ।
वैशाखमा नियन्त्रणबाहिर पुगेको संक्रमण जेठदेखि केही कम हुँदै गएको छ । हाल काठमाडौं उपत्यकामा संक्रमितको संख्या घट्दो छ । तर, देशभर परीक्षण गरिएका मध्ये झण्डै २० प्रतिशत व्यक्तिमा संक्रमण देखिइरहेको छ ।
उपत्यकामा दिनहँु ५ सय हाराहारी संक्रमित भेटिने गरेका छन् । निषेधाज्ञा जारी गर्नेबाहेक अन्य काम हुन नसकेको उल्लेख गर्दै डा.वन्त परीक्षण बढाउने र स्वास्थ्य मापदण्ड पालना भए–नभएको अनुगमन नगरे ठूलो क्षति पुग्ने बताउनुहुन्छ ।
उपत्यकामा अहिले करिब ९ हजार सक्रिय संक्रमित छन् । तिमध्ये काठमाडौंमा मात्र ५ हजारको हाराहारीमा छन् । एचडीयू, आईसीयू र भेन्टिलेटरमा नै ७ सय बढी व्यक्तिको उपचार भइरहेको छ । निषेधाज्ञाको क्रममा पनि संक्रमितको संख्यामा सोचेजस्तो गिरावट नदेखिनुले संक्रमण अझै फैलिरहेको भन्ने बुझाउँछ ।
यसबीचमा सरकारले परीक्षणको दायरा बढाउनै सकेन । परीक्षण घट्ने र निषेधाज्ञा पनि खुकुलो बनाउने अनि जनस्वास्थ्यका मापदण्डमा कडाइ नगर्ने हो भने संक्रमण पुनः थेग्नै नसक्ने अवस्थामा नपुग्ला भन्न सकिँदैन ।-इमेज खबर
प्रतिक्रिया लेख्नुहोस्:-