काठमाडौं । गलत सूचना र समाचारको सम्प्रेषण अनि बारम्बार प्रयोगकर्ताको डेटा लिक भएका कारण धूमिल हुँदै गएको फेसबुकले आफ्नो कर्पोरेट नाम नै परिवर्तन गरेको छ । स्थापनाको १७ वर्षपछि बिहीबार फेसबुकले आफ्नो कर्पोरेट नाम अबदेखि ‘मेटा’ राख्ने निर्णय सार्वजनिक गरेको हो ।
यससँगै फेसबुक, इन्स्टाग्राम, ह्वाट्सएप र ओकुलसको मुख्य कम्पनीको नाम अब मेटा इङ्क हुनेछ । बिहीबार आयोजित फेसबुकको एआर/भीआर केन्द्रित कार्यक्रमका दौरान फेसबुकका संस्थापक मार्क जुकरबर्गले नयाँ नाम घोषणा गरेका हुन् ।
नयाँ नामले मेटाभर्स निर्माण गर्ने कम्पनीको खास लक्ष्य र उद्देश्यलाई प्रतिबिम्बित गर्ने उनले बताए । ‘हामी को हौं र हामी के बनाउन चाहन्छौँ भन्ने कुराको प्रतिविम्ब देखाउन, आज म गर्वका साथ घोषणा गर्दछु कि आजदेखि सुरु हुने गरि कम्पनीको नाम मेटा हुनेछ ।’ ‘हाम्रो उद्देश्य अझै पनि उही नै छ, मान्छेहरूलाई जोड्ने। हाम्रा एपहरू र हाम्रा ब्रान्डहरू भने बदलिने छैनन्’ जुकरबर्गले उक्त कार्यक्रममा भनेका छन् ।
सामाजिक सञ्जाल कम्पनी फेसबुकले आफ्नो कम्पनीको नाम परिवर्तन गरेर मेटा बनाएको छ । नयाँ नामले आफूले गर्ने गरेको कामलाई विस्तृतमा समेट्ने फेसबुकका प्रमुख मार्क जुकरबर्गले बताएका छन् ।
कम्पनीले बिहीबार क्यालिफोर्नियास्थित मेन्लो पार्कको मुख्यालयमा नयाँ लोगो पनि सार्वजनिक गरेको छ । कम्पनीले सामाजिक सञ्जालभन्दा बढी भर्चुअल रियालिटीजस्ता क्षेत्रमा आफूलाई विस्तार गर्ने योजना अनुसार नयाँ नाम राखेको हो ।
जुकरबर्गका अनुसार माउ कम्पनीको नाम परिवर्तन भएपछि फेसबुक, इन्स्टाग्राम वा ह्वाट्सयापजस्ता कुनै एउटा प्लेटफर्मको नाम फेरिने छैन । नयाँ नामले समयसँगै प्रयोगकर्ताले कम्पनीका अन्य सुविधा प्रयोग गर्न फेसबुक प्रयोग गर्नु नपर्ने उनको भनाइ छ ।
जुकरबर्गले मेटाभर्स बनाउने योजनाहरू सार्वजनिक गर्दै कम्पनीको नयाँ नाम घोषणा गरेका हुन् । मेटाभर्स मानिसहरूले भीआर हेडसेटको प्रयोग गरेर काम गर्न, खेल खेल्न वा सञ्चारका लागि प्रयोग गर्न सक्ने अनलाइन दुनियाँ हो । सन् २०१५ मा अर्को ठूलो प्रविधि कम्पनी गुगलले पनि आफ्नो माउ कम्पनीको नाम परिवर्तन गरेर अल्फाबेट बनाएको थियो ।
प्रतिक्रिया लेख्नुहोस्:-